COĞRAFİYAÇI ALİMLƏR EKSPEDİSİYA ZAMANI DRON ÇƏKİLİŞLƏRİNİ SINAQDAN ÇIXARIBLAR

26 İyun 2018

2018-ci il, iyun ayının 23-24-də Azərbaycan Coğrafiya Cəmiyyətinin üzvləri akademik R.Məmmədovun rəhbərliyi ilə Neftçala və Salyan rayonlarında ezamiyyətdə olmuşlar. Dosent M.Həsənov. aparıcı elmi işçilər, coğrafiya üzrə fəlsəfə doktorları - Mirhuh İsmayılov, Müseyib Yunusov və Elxan Məmmmədbəyov, böyük elmi işçi, c.ü.f.d. Mətləb Rəhimov, elmi işçi Emil Cəbrayılov ekspedisiyada iştirak etmişlər.
Alimlərimiz ekspedisiya zamanı dron çəkilişlərini sınaqdan çıxarmaq məqsədilə  özləri ilə AMEA-nın Yüksək Texnologiyalar Parkından pilotsuz uçan aparat götürmüşlər. Elmi-tədqiqat işində əsas məqsəd dron müşahidələrindən istifadə etməklə Kür çayının Neftçala rayonu ərazisindən keçən hissəsində, habelə Xəzərin sahil zonasında tədqiqat aparmaq, mövcud vəziyyətin məsafədən zondlama üsulu ilə foto şəkillərini çəkmək, gələcəkdə, kameral şəraitdə həmin şəkilləri əvvəlki fotoşəkillər və iri miqyaslı xəritələrlə müqayisə edib sahil zonasında və Kür deltasında baş vermiş dəyişikliklərin əsas tendensiyasını aşkar etmək olub.

Dron uçuşları quruda, Kürün sahili ilə uzanan bəndin üzərində aparılmış, eyni zamanda həmin ərazidə ilkin landşaft tədqiqatları aparılaraq xeyli faktik material əldə edilmişdir. İlkin olaraq belə bir nəticə əldə edilmişdir ki, son bir neçə il ərzində Kürün sahillərində, çayın mənsəbindəki deltada, çay vasitəsilə ərazidən ayrılmış adalarda xeyli dəyişikliklər baş vermişdir. Eyni zamanda çayın yaratdığı adalar da təbii landşaft antropogen dəyişikliklərə daha az məruz qalmışdır.

Mütəxəssislər eyni zamanda Bankə qəsəbəsindən Kürün Xəzərə töküldüyü yerə qədər 20 km-lik məsafəni qayıqla keçmiş, orada da drondan istifadə etməklə təqribən 500-ə qədər şəkil çəkmişlər. Bu faktik müşahidələrlə Kürün yatağında baş vermiş dəyişikliklər də alimlərin diqqətini cəlb etmişdir. Burada ilkin nəticə olaraq qeyd etmək lazımdır ki, Kürün mənsəbində çay yatağının təmizlənməsi (dərinləşdirilməsi) işi davam etdirilməlidir ki, gələcəkdə çay daşqınlarının zəiflədilməsinə şərait yaradılsın.

Mütəxəssisləri gələcəkdə də AMEA YTP-nın imkanlarından daha çox istifadə etməklə  bu tip tədqiqatların aparılmasını planlaşdırırlar.



 

50
BİZİ İZLƏ
TƏQVİM
COĞRAFİ TERMİNLƏR
TƏKLİF GÖNDƏRİN
AZƏRBAYCANI TANI

Azerbaijan

  • Reklam
Azərbaycan Milli Elmlər Akademiyası Coğrafiya institutu Azərbaycan Milli Kitabxanası GoMap National Geographic